4月13日晚，收到電話需要臨時托一隻貓女，接到貓貓之後好匆忙地做準備。當佢仲響飛機籠嘅時候好安靜，無大吵大鬧無衝籠，過籠時佢都好乖無掙扎，響果一刻我先第一次見到佢全相。眼大面圓毛色突出，成個混血兒咁靚女，就係咁我叫佢做大眼妹。入籠後我觀察佢做完絕育嘅傷口，發現佢嘅乳頭特別紅腫，即刻問義工佢係咪響做絕育嘅時候被墮胎，當時義工話做SPCA嘅表格上面寫無墮胎亦唔係哺乳中，我都不以為然。
點知到第二晚我如常餵罐罐，大眼妹主動起身喵我，仲要我伸手去摸佢嘅時候越黎越溫柔，心諗你個八妹係咪識聽人話，唔想返去所以突然變乖左。但係佢變溫柔左嘅同時，都仲係一副生無可戀好似記掛住某啲嘢咁樣，一個念頭閃過：兩歲貓女，乳頭咁大，唔通佢真係之前生過貓B仲響伯伯度？
4月29日，收到電話原來真係有三隻一個月大嘅貓B響原居地，當刻我真係呆左，約好義工叔叔之後就去左搵果位伯伯，希望帶貓B做檢查，情況理想就出領養。一心諗住三隻貓B都可以順利帶走，點知其中一隻已經比人帶走左。雖然可惜，但係我地起碼將剩低果兩隻帶返去大眼妹身邊。兩隻貓B都好靚仔，一隻長尾巴黃眼睛叫阿黃，另一隻就短尾藍眼睛叫楠楠。
返到屋企幫貓B做檢查嘅時候先發覺身上面都係跳蚤，我地足足用左五個鐘先可以將佢地清潔好，做曬所有功夫之後就帶阿黃去大眼妹身邊，我當時真係滿心期待有個大團圓結局。但係佢地嘅見面帶黎只係互相敵視對方，氣氛亦非常之差，我無奈地分開阿黃同大眼妹再諗其他方法。我當時好自責點解唔早啲發現大眼妹有貓B，或者佢地分開太耐忘記左彼此嘅味道先會抗拒對方… 如果佢休息夠七日就即刻放返原居地一家團聚會唔會又唔同？
第二日再試下將佢地兩個籠並排一齊，中間用毛巾擋住，好可惜情況都仲係未如理想… 明明係血肉之親，但確視而不見不瞅不睬。
一個星期過去，我對大眼妹講：你係咪真係好唔鍾意呢度啊？成日都悶悶不樂咁，如果呢個地方令你唔開心，咁我聽日帶你返伯伯度啦。 就響同一晚阿黃同楠楠如常出籠散步嘅時候，大眼妹好奇地望住呢兩個小朋友走來走去，從來都係得一個訓覺姿勢嘅佢居然好緊張咁響籠裡面踱步。
大膽嘅想法又出現，我將楠楠放入籠裡面同大眼妹單獨相處。互相觀察好一段時間之後，大眼妹終於伸出神之舌頭舔楠楠個身喇！機不可失之下我當然擺埋阿黃入籠，今次大眼妹無再好似第一次咁抗拒呢個小朋友。由大眼妹抗拒到慢慢接受，我好體會到佢嘅轉變，望住一家三口而家好溫馨咁相處，就算等待時間再長都值得。
每次返到屋企望住一家三口依偎彼此，我地都覺得唔應該再分開大眼妹一家，單純為貓B出領養的話我地都相信好快會有回音，不過響我地心目中，暫托呢個身份並唔係純粹比貓暫住後送佢離開，而係觀察貓嘅行為嘗試理解佢嘅感受，再安排一個可以令佢日後舒適自在嘅環境。 CCCP原意係幫毛孩絕育放回，雖然我都會同自己講唔好搭沉船唔好擺感情，暫託到毛孩康復好就放回原居地，但係每一次暫託都難免牽動自己嘅情感，大眼妹由唔太親人親貓到願意接受自己家人同比我摸，轉變之大令我覺得唔應該放棄佢而只出貓B領養，難道唔親人親貓嘅毛孩就唔值得一個屋企嗎？
放回原居地好簡單直接，放低就可以頭也不回地走，固執地想一家三口咁出領養可能係好傻，甚至要等好一段時間都無人問津，但係如果呢份傻勁可以為佢地帶黎幸福貓生，我願意為大眼妹這一家堅持落去。